Illoraesos in su mundu · Istiu 2027

Sa Torrada. Torramus totu a Illorai.

Un'istiu, una fine de chida, una 'idda prena comente una 'olta. Semus organizende sa torrada manna de sos illoraesos ispartos in Sardigna, in Itàlia e in su mundu. Nara·nos chi bi ses.

Bae a su tzensimentu Conta·nos s'istòria tua

Su mòdulu de adesione arrivat in pagas dies. Intantu lassa su nòmene tou in su tzensimentu: t'iscriimus nois.

illoraesos za in elencu: 440; illoraesos za in elencu
tzitades e biddas: 78; tzitades e biddas
natziones: 12; natziones

Nùmeros beros, azornados dae su registru de su comitadu. Mancant ancora nòmenes meda: forsis su tou.

Proite

Sa 'idda s'isbòidat. Ma nois semus meda.

In Illorai abbarrant mancu de otighentas persones. Sos illoraesos chi vivent in foras, dae Terranoa a Toronto, sunt meda de pius. Onzi festa la faghimus cun sa timòria chi siat s'ùrtima. A pustis arrivat s'istiu, sas domos s'aberint torra, sa piazza si prenat, e pro carchi die sa 'idda torrat cussa de semper. Cherimus chi cuss'istiu, una 'olta, lu fatzamus totu paris, in sa matessi fine de chida.

Chie est partidu
Babbos e mamas, fizos, nebodes. Chie est andadu in sos annos sessanta e chie s'annu passadu. Totu cun unu cantu de Illorai in busciaca.
Chie est abbarradu
Chie mantenet abertas sas cresias, sas festas, sas domos. Chie isetat austu pro bìdere torra sas caras de semper.
Chie no b'est mai istadu
Sos fizos e sos nebodes naschidos a tesu, chi de Illorai connoschent isceti sos contos. Custa 'olta la bident.

S'eventu

Una fine de chida de istiu, totu a domo

Intre làmpadas e austu 2027. Sa die pretzisa la seberamus paris: in su mòdulu nos naras cando podes torrare, e organizamus a inghìriu a bois. Custas sunt sas ideas in sa mesa.

Sa mesa manna
Unu bustu longu, totu in sa matessi mesa, in bidda o in monte, cun su chi s'est semper coghinadu in Illorai.
Sa foto de totu
Una fotografia de totu paris, cun sos nòmenes iscritos a palas, de custodire in onzi domo.
Su sero
Tenores, ballos e organetu in piazza finas a tardu, comente in sas festas de una 'olta.
Sos logos
Luche, Jscuvudè, Molia: sos logos de sa 'idda abertos torra a chie no los bidet dae annos e a chie no los at mai bidos.

Su programma definitivu l'amus a pubblicare inoghe e in sa newsletter. Chie s'iscriet como lu retzit pro primu.

Comente funtzionat

Tres passos, e nos bidimus in piazza

1
Cumpila su mòdulu
Nòmene, inue vives, cando dias pòdere torrare, in cantos sezis. E si ti agradat, conta·nos de tue.
2
Ti torramus a chircare
Su comitadu t'iscriet pro cunfirmare sa die e pro ti nàrrere ite serbit. Nudda spam, promissu.
3
Torras a Illorai
T'isetamus in piazza. Chie arrivat dae a tesu nos lu narat in su mòdulu: nos organizamus paris.

Bae a su tzensimentu

Sas boghes

Onzi mese una telefonada, una vida

Prima ancora de nos bìdere, cherimus nos ascurtare. Onzi mese mutimus un'illoraesu in su mundu e nos faghimus contare sa vida sua: cando est partidu, ite at agatadu, ite li mancat, ite diat chèrrere nàrrere a sa 'idda. Nde faghimus unu contu e lu mandamus a totu sa comunidade, illoraesos e no.

Una telefonada o una videochiamada de mesa ora, cando cheres tue. Iscriimus nois, tue torras a lèzere e aprovas. In su mòdulu bastat a sinnare sa casella.

Sas primas intervistas sunt za in traballu.

Bae a su tzensimentu